موصلنا

منتدى مستقل


    العربنجي ..يبدع

    شاطر

    ابن السرجخانة

    عدد المساهمات : 27
    تاريخ التسجيل : 03/11/2010

    هاه العربنجي ..يبدع

    مُساهمة من طرف ابن السرجخانة في الثلاثاء نوفمبر 29, 2011 12:56 am

    مقال منقول من موقع كتابات



    گرة عيونك...ســــــيدي

    حبيب العربنجي
    [color:65f1=#06c]الاثنين، 28 تشرين الثاني، 2011 الساعة 23:05


    هالمرة جماعتنا ما راح يگدرون يفتحون حلگهم أو يعترضون لأن الحچي مو عراقي والحكم مو ماليزي. الحچي هالمرة من الجنرال رحيم صفوي...وشلون صفوي هذا..يشگ المطي...يگول بترس الحلگ وحيل صدر وبطن ، ان إيران دا تلعب لعب في العراق وبالعراق...ليش تفضل علينا علي اللباخ بطلعته البهية وگذلته الدهينة ويتنحنح عالشاشة ويگول " هذا كلام أزلامي وماكو أي إشارة للوجود الإيراني في العراق" ! مو خطية الإيرانيين داخلين العراق ورايحين منطقة ما بيها إشارة ولا تغطية وكل ما نحاول نلگف إشارة منهم يجينا جواب.." عزيزي العراقي الغشيم...يرجى المحاولة فيما بعد لأن ماكو إشارة...زووووووووووج".
    لو جماعتنا يفتهمون ولو وزارة الخارجية مو طولة قماش بيد (خوش خيار) چانت تسجل هذا التصريح وتوزعه على نوام مجلس النوام بلكن يصحون...مو بس نشوفهم صاحين وكت الحج حتى جماعة أبو خد التفاحة الرفيق الماركسي حميد مجودي يصيرون صوم وصلاة وتراويح حتى ياخذون حصتهم من الحج الدستوري بحسب قرار مجلس قيادة الكلاوات الدستورية...لصاحبها الرفيق الهمام ...همام .
    وينه رئيس النوام الرفيق صخامة...أكيد مشغول بالديكور الجديد لبيته المتواضع إللي عبالك صرايف الشاكرية وحاير بموديل التواليت غربي لو شرقي، وينه عارف بي تيفور ولا كعك السيد ، وينه الدكتور الفطحل مال التيار المموي، مو هذولة رؤوس المجلس، واحدهم يشيل مخدة، والثاني لحاف، والثالث يطمن أن الضوا مطفي ...حتى لا حد يزعج النومة...والنومة بيها معنيين...نومة العوافي...ونومة الخصاوي.
    هذا الحچي مال الجنرال صفوي ثروة للعراق وعدال تعويضات بمية وطنعش مليار دولار إللي طالب بيهن عزيزي عزوز لإيران لان هذا الحچي ينسف كل الكلام إللي يگول إيران بحالها...كافية خيرها شرها. وبهالحچي يگدر كل عراقي شريف إللي ينظر لإيران على إنها بالوعة المشاكل...يگدر يطالب بتعويض عن تدمير وطنه، بيته، مستقبله وأهله وذبح أولاده...بس لازم الحچي يتوثق، وهم زين قناة (العراقية) عرضت الخبر لأن هاي القناة تعتبر قناة رسمية بكل علاتها وچفصاتها وممكن إعتبار هذه المادة الخبرية وثيقة شعبية لإدانة إيران غصبن على أي عمامة إشگد ما چان عدد لفاتها وشنو ما چان لونها...ولو كره الحوزويون...بكافة موجاتهم العاملة...آيات الله البينات وغير البينات إللي بعدهم مطفين بإنتظار الشحن من قم...وطبعا الشحن لازم بواسطة خرطوم مقري عليه وبعدين تافل عليه بتفلته المباركة ما اعرف منو (ما اريد اكتب الأسم حتى لا أوسخ الصفحة).
    بس المشكلة إن الأمير الكتكوتي السعيد إبن عزيزي عزوز ما يسمع لأن هو مشغول بإعادة تركيب قطع الدومينو إللي تساقطت قطعة ورا قطعة وإجانا بإختراع عجيب...بكتلة (المواطن) الحزبية بس ما بيها كونكريت...كتلة أخف من الكاغد بالماي...من نعلة على گصة المواطن إللي يبيع وطنه وينام أربعة وعشرين ساعة بحضن إيران...وإيران أبد مو راحة ...أي واحد يگعد بحضنها يشبع بعابيص، وبالعافية . يا (مواطن) هذا إللي دمر الوطن بسبب عمامة؟ ...وشلون خماسي مدفعچي بهالتشكيل القتالي!!...بس والله فرحت من سمعت إسم أبو العيون الكحيلة جلال زغيروني لأن تأكدت بعده زغير وبعده عايش لأن أتمنى له نهاية اضبط من نهاية محمد عايش بيد أبو الأزلام ...صاحب براءة إختراع رگصة (هز الشوارب) ولا رگصة WALKING ON THE MOON للمرحوم مايكل جاكسون...عجل الله معرفة سر موته.
    گرة عيونك سيدي....ومولاي (ــ) ضع إلمن تريد بالفراغ وشوف منو إللي يستاهل نگول له گرة عيونك عالوضع إللي دا نعيشه بالعراق بلاد ما بين الزبلين...زبل العمامة...وزبل الطربوش، بلاد ما بين العهرين...عهر السياسة وعهر الجهل...بلاد ما بين القهرين...قهر الأزلام وإللي أجوا بعد الأزلام...بلاد ما بين النصرين...النصر الإيراني والنصر الأقليمي الفديرالي الديمقراطي للجماهيرية العراقية الفيدرالية الأقليمية العظمى بالعراق.
    ننتظر يطلع إلنا الستياني ويگول هو ما يتبع الستيان الإيراني في المقاس والموديل والحجم واللون رغم إنو دا يعيش بالمجتمع العراقي ولازم يلبس لبسنا...وأنتو عيوني الغشمة أيها العراقيون التعساء والبؤساء وفيكتور هيجو وساندي بيل...رجعوا بذاكرتكم إلى أيام كاس السم القزلقرط بيد الخميني ..بلكن نتذكر أيام چان لسان الجنرال صفوي أقصر من ذيل الخنزير...وچان ما يگدر يطلع راسه لتصيده رصاصة قناص عراقي بطل أستوى بالحجابات دا يريد يصيد راس إيراني خايس قبل ما ينزل إجازة يعرس بيها .....أيام چانت عدنا هيبة...بس إشگد الفرق بين الهيبة والخيبة.


      الوقت/التاريخ الآن هو الأحد سبتمبر 23, 2018 5:28 am