موصلنا

منتدى مستقل


    رائعــــة العربنجي ( منقول )

    شاطر
    avatar
    سعاد يونس

    عدد المساهمات : 17
    تاريخ التسجيل : 31/10/2010

    رائعــــة العربنجي ( منقول )

    مُساهمة من طرف سعاد يونس في الأحد أبريل 08, 2012 2:30 pm




    الچـــودرة والقـــوبغة


    حبيب العربنجي
    [color:55d0=#06c]السبت، 7 نيسان، 2012 الساعة 22:14
    أكو لقطة بفيلم أو مسلسل مدا أتذكر شنو أسمه...يگول بطل الفلم - طبعا ما يحچي عراقي بس للضرورة العربنجية راح أكتب كلامه باللهجة العراقية – يگول" الواحد لازم كل شي يسويه صح...حتى الغلط لازم يسوي بطريقة صحيحة حتى يطلع الغلط حلو"...خوش حچي ومال أوادم...وإللي خلاني أستذكر هاي اللقطة هو وجود أغلاط في المجتمع العراقي ...وكل غلط ينافس الغلط إللي بصفه في كمية الأخطاء (أكو فرق بين الغلط والخطأ...فالغلط يجي من اللغط في طريقة المعالجة...والخطأ يجي من تطبيق خطة المعالجة). وغلطنا اليوم هو طغيان ثقافة الچودرة والقوبغة في المجتمع العراقي.
    مجمتعنا تحول إلى مجتمع مچودر ومقبغ بدون المرور بالفترة الإنتقالية ومن هذا دا نشوف نسوان العراق يلعبن النفس بالعباية السودة البيتنجانية الأفغانية الإيرانية المصرية السعودية الإخوانية السلفية الإمامية الحوزوية...لأن نسواننا دخلن بهاي المعمعة إجبارا لا إيمانا ولا تطوعاً بل نفاقا...وأكثر النفاق هو النفاق السياسي للذين يؤمنون بالدياسية (فكر الدين السياسي).
    خرة بالحظ...هسة آني جيبلي تشريب شلغم ما مستوي ولا تگول گدامي إسم السعودية...بس واحد حب و أحچي وأكره إحچي...المرأة السعودية هي في المرتبة الثانية على قائمة أكثر النساء أناقة وصرف على جمالها (مليارين دولار سنويا صرفيات المرأة السعودية على بشرتها)...صح هي مقبغة وعبالك شرشبيل منقب لأسباب أمنية بعيدا عن عيون بابا سنفور ...بس المرأة السعودية تهتم بجمالها وأناقتها وعبايتها السودة إللي تتفنن في زخرفتها...لأن المرأة السعودية في هذا المزاج والكار منذ إعلان دولة العائلة الواحدة مع الأعور الدجال عبدالعزيز آل سعود وحتى قيام الساعة بحسب توقيت گرينتش...يعني عرفت الفلم وصارت رغم چادرها...تفوح اناقة وعطر يخبل إلى درجة واحد يتمناها مكشفة مو مقبغة ومچودرة لأن فتنتها أكثر وهي غامضة خلف عباية سودة بسواد حظنا وبختنا.
    وإحنا...آويلي من إحنا...تحولنا إلى الچودرة والقوبغة (يعني من القبغ – الحجاب) بفعل فاعل وليس بفعل قلب مؤمن (والله لو نسوي چرخلة ما نلگى قلب مؤمنة واحدة من بين عشرة ألاف مقبغة ومچودرة)...نسواننا ما فاهمن شنو الفلم وشلون يطلعن ( نساء ) وهن محجبات بحسب دستور حجي همام ...شوفهن باللجان النيابية عبالك توهن جايات من ثرم البصل...ريحة تلعب النفس...خو الچهرة....عبالك وحدة توها شافت زوجها وي غير وحدة على فراشها بغرفة نومها...تحمض العجينة غير المختمرة على عناد باسل العزيز إللي دوخنا في دعاية الخميرة " قصتي قصة حزينة...ما تختمر هاي العجينة" نگول بشراك يا باسل...جيب عجينتك وتدلل...خليها گدام التلفزيون وخبر واحد لاي لجنة نيابية وشوفة چم نائمة مچودرة...راح تنفش العجينة وتختمر بدون خميرة ولا بايكينگ باودر...إللي من چنت زغير ما چنت أفرق بينه وبين بيكنباور...القيصر.
    والمصيبة هي أن قسم من النائمات الحوزويات والسلفيات والوهابيات يشاركن في مؤتمرات برلمانية ونسوانية في دول الخليج إللي نسوانهن كلهن كشخة ويعرفن سر العباية السودة وشلون يلبسنها...وتجي النائمة العراقية...ما غاسلة وجهها القذر...والحواجب عبالك أمازون...وقسم منهن ما عدهن مانع يحلفن بشواربهن...أما الريحة....فأأأأأأأأأأأأأأأأأأأف....وتففففففففففففففففففف.
    ولكم عيب...صدگوني عيب...هاي الچهرات تطلع عالتلفزيون...أي وينها وزارة حقوق الإنسان؟؟؟ بشرفي شوفة هذولة هي ضد حقوق الإنسان في التمتع برؤية الجمال أو العيش في بيئة صحية ونظيفة...أگول هذا بحرقة وآني أشوف لقطة لمسيرة نسائية (أنظر نسائية وليست نسوانية) في شارع الرشيد – بغداد سنة 1953...مسيرة جميلة ..صح أكو چم وحدة لابسات عباية...بس شعرهن طالع برة بجمال وحرفنة...والبقية لابسات تنورات ..اناقة..يمشن شايلات ورد...هيچ چنا...من چان الجمال مشاع لكل الناس...أموت وافهم ليش رب العالمين ينطي للمراة جمال الشعر وبعدين يعتبرها عورة...وداعتي ماكو عورة غير العقول إللي تؤمن بان شعر المرأة عورة بدال ما يعتبروه جمال وتاج الجمال.
    عيوني
    إحنا بلد عشتار ...وشبعاد...وسميراميس (من چانت الشام ضمن الإمبراطورية الآشورية)...وإحنا بلد نازك الملائكة..زهاء حديد...وإحنا بلد عفيفة اسكندر...وزهور حسين.....بلد هناء أدور...كلش عيب علينا نتحول ونصير بلد مهاوي...لو بنت گاصد...لو سوزانا...وأول مرة من سمعت سوزانا گلت خير يمكن تطلع مثل مادونا وتگعد بالبرلمان...بس طلعت عبالكم مرضعة السيد القائد....حبيبي...قائدنا نبراس...ينضرب بالمداس. ولكم وداعتي عيب.
    خلاص...راح أروح أبيع التلفزيون إل سي دي مالتي إللي جبته عبالي تلفزيوناتنا بعدها تطلع البرنامج الرائع (حدائق جنة الأحلام) حتى أگعد أتفرج على الحدائق العالمية وأبتعد عن مزاج الزبالة ...راح أبيع التلفزيون...لأن أينما تولوا وجوهكم فثمة زبالة...من الشارع وحتى البرلمان...والزبالة الاكثر قذارة...رؤية نائمة مچودرة مقبغة...تتكلم بأسم الشعب..من نعلة على حظ الوطن الخايب. والعاقبة...للضياع.

    الموضوع منقول من موقع كتابات

      الوقت/التاريخ الآن هو الإثنين نوفمبر 20, 2017 10:22 am