موصلنا

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
موصلنا

منتدى مستقل


2 مشترك

    حبيب العربنجي

    avatar
    ابن السرجخانة


    عدد المساهمات : 27
    تاريخ التسجيل : 03/11/2010

    حبيب العربنجي Empty حبيب العربنجي

    مُساهمة من طرف ابن السرجخانة الجمعة ديسمبر 10, 2010 1:02 am

    إلى قندهار... در
    كتابات - حبيب العربنجي
    أكو فلم سينمائي أسمه (أسامة) للمخرج الأفغاني صديق برمك –إنتاج 2003، يصور النفاق في افغانستان وحركة طالبان وشلون يقشمرون الغشمة. الفلم عن أم أفغانية تترمل وما عدها غير إبنية عمرها إطنعش سنة، ولأن حركة طالبان تمنع خروج النسوان للسوق فهذا يعني حكم إعدام على هاي الام وبنتها لأن شلون راح يطلعون للسوگ ؟ حبيب العربنجي S1814
    فتقرر الام تحويل البنت بالملابس إلى ولد وخاصة أن صدر الإبنية بعده ما مبين وتسميها (أسامة) وتتحول البنت إلى ولد بالملابس فقط حتى تنزل للسوق وتشتغل بإعتبارها ولد وتنجح الام في خداع مراقبي طالبان . ولأن لازم كل ولد يروح يحضر جلسات تحفيظ القرآن ...فتضطر البنت (أسامة) أن تحضر هاي الجلسات حتى لا تنكشف الخديعة.
    وفي درس الجنابة وغسل الجنابة يجبر الملا كل طفل أن ينزع ملابسه وينزل وياه لحوض ماي حتى يعلمه شلون غسل الجنابة، ويتحارش بيهم واحد واحد بالحوض والاطفال ووياهم (أسامة) دا يباوعون على أساس تعليم الدين وغسل الجنابة...وصاحبنا الملا الطالباني (يعني من جماعة طالبان وما إله أي علاقة بضخامة الطالباني مالتنا) يستلم الأطفال بالسرة وعينه على (أسامة) لأن تقاسيمه حلوة وناعمة...إلى ان يوصل السرة عد (أسامة) فتهرب حتى لا تنكشف هي أبنية بس اللوتي الملا الطالباني يعرف بالموضوع فيكوم يخبر مراقبي طالبان حتى يمسكون الام و(أسامة) ويعدموهم .
    هاي هي كلاوات طالبان إللي جماعتنا يريدون تحويل بغداد إلى قندهار...والله حايرين ما نعرف إحنا منو...أشو مرة إحنا وي إيران ومرة وي أفغان...ويمكن المرة الجاية وي طرزان لان إحنا قرود وحيوانات ما دام راضين بحكومة تحولنا بكيفها إلى اليمين در و إلى قندها در !
    ومن هاي الكلاوات مليانة حكومتنا من أعلى قمة العمامة حتى تنكة القمامة... لا دين ولا دستور ولا شرع مثل الملا إللي دا يعلم غسل الجنابة . هسة شنو علاقة العرگ بالدستور! ولو آني صار لي يومين أريد ألگي علاقة جدلية بين هيئة إجتثاث الأزلام وهيئة إجتثاث المسرح والموسيقى من معهد الفنون الجميلة !
    وهمين أثبتنا للعالمين إن العراقي طبل فارغ وهوسجي بدرجة سبرانو ثمانية أوكتاف ومزعج بلا فائدة.. لأن المعلمين في كل مدارس العراق ثاني يوم من منع تدريس الموسيقى والمسرح راحوا للدوام ولا كأن صار شي..والطلاب راحوا للدوام...والأسواق كانت مفتوحة وعادية...ومحمود عثمان بعده موجود على كل القنوات العاملة السمعية والمرئية.. ولو هالشي صاير في أي مزبلة بالعالم چنا نشوف فيران المزبلة يطلعون مظاهرات وإحتاجاجات وينشرون زبالة المزبلة عد كل بيت بالدربونة...وخليها تتوزع الزبالة..بس إحنا وين والفيران وين !
    حتى (المثقفين) نص ردن..بس هوسات وشعارات لأن هم خريجي جامعة تاجر النعلان للهوسجية...ولا أكو جريدة توقفت عن الصدور إحتجاجا على قرار منع الموسيقى والمسرح، ولا ممثل مسرحي أعلن إضراب عن الطعام أمام معهد الفنون الجميلة وهسة الجو حلو يعني چان يتحمل الجوع والعطش ست ساعات...ولا قناة تلفزيونية عراقية سوت هجوم معاكس وخصصت يوم بث كامل لمسرحيات عراقية و موسيقى عراقية وإمتنعت عن قبول أي تصريح رسمي عراقي أو تغطية أي نشاط حكومي عراقي ! كل هوساتنا كلاوات...
    وگالها المتنبي العظيم
    من يهن يسهل الهوان عليه...ما لجرح بميت إيلام
    ولأن العراقيين قبلوا الإهانات على نفسهم وعلى تاريخهم الإنساني والحضاري ...فما همهم شي...منع موسيقى لو منع مسرح لو منع ليالي الانس في أبي نؤاس...وأشوية أشوية ومن نقترب أكثر من قندهار...راح نشوف بنات بعمر تسع سنوات يتزوجن بالإجبار..وراح نشوف إجبار الأباء بذبح أولادهم إقتداءا بسنة إبراهيم الخليل ومحاولته ذبح إسماعيل ، وراح نصير مثل وزيرستان من يروح الباكستاني ويشتغل في أماكن بعيدة أو دول أخرى يترك لباسه الشرعي (او الاندروير) عد الملا في القرية...ويروح سنة ...سنيتن...ثلاث سنوات ما يشوف مرته...وهناك يجي له خبر إجا له ولد فيگوم يوزع چكليت وهو بعيد عن مرته ألاف الكليومترات...ومن تساله شلون إجا لك ولد ! يجاوبك " مو لباسي عد الملا " لأن الملا مقشمرهم وگايللهم إذا واحد يلبس لباسك ويدخل على مرتك بهالحالة چنك أنت وي مرتك...ومن الملا ينام وي مرته ويجي له ولد وهو بعيد عن زوجته ألاف الكيلومترات فهذا أكيد أبنه لأن المهم الملا كان لابس لباسه إللي خلاه أمانة عد الملا حتى يلبسه من يروح يشوف إحتياجات الزوجة المسكينة و تصير الخلوة شرعية !
    وحكومتنا دا تعاملنا مرة مثل (أسامة) ومرة مثل وزيرستان...ولا تصدگوا هاي اللحى وراها خير ..ولا جوا أي عمامة أكو دماغ إلا فراغ بشري وحضاري ..وجوا كل عباية مزبلة ...وكل خاتم هو إشارة إلى ختام الإنسانية والعقل في هذولة الجهلة !
    وإذا فشلوا (المثقفين) في إدارة هذا الصراع...فآني أقترح تسليم راية الصراع إلى العربنجية والدنبكجية والقندرجية...وراح تشوفون شلون ما راح تلگون ولا عربانة تبيع لبلبي إحتجاجا على قرار منع العرگ...ولا بقال يبيع خيار إحتجاجا على منع الجاجيك...وراح تسمعون أبو يعگوب يوسف عمر بكل لوفة يغني بدال المقتل وتشوفون رقص الهجع والچوبي بدال اللطم والطبر..وراح نگدر نوگف رحلة الحكومة بإتجاه أفغانستان وإيران...وراح نعلنها العراق أرض السكارى الاحرار...إللي يسمعون الموسيقى بالليل والنهار...وبالرقص والمسرح يقاومون الملالي والأشرار.... و نگول..باباي قندهار.
    حاتم الطائي
    حاتم الطائي


    عدد المساهمات : 108
    تاريخ التسجيل : 30/10/2010
    العمر : 83

    حبيب العربنجي Empty رد: حبيب العربنجي

    مُساهمة من طرف حاتم الطائي الجمعة ديسمبر 10, 2010 1:12 am

    وراح تسمعون أبو يعگوب يوسف عمر بكل لوفة يغني بدال المقتل وتشوفون رقص الهجع والچوبي بدال اللطم والطبر..وراح نگدر نوگف رحلة الحكومة بإتجاه أفغانستان وإيران...وراح نعلنها العراق أرض السكارى الاحرار...إللي يسمعون الموسيقى بالليل والنهار...وبالرقص والمسرح يقاومون الملالي والأشرار.... و نگول..باباي قندهار.
    عفية حبيب ...عفية ونص
    لا الملا الاعور ملك قندهار في افغانستان .... ولا اية الله ابو الخيار في ايران
    قادرين على فرض فلسفة عقائدهم على روؤس العراقيين
    العراقيون شعب يستعملون ( القوندرة ) اذا ما ثاروا
    ويامحلى صوت الدنبك ...يوم الملالي يتفلش وضوئهم

      الوقت/التاريخ الآن هو الجمعة مارس 29, 2024 10:11 am